O presidente da Deputación da Coruña, Diego Calvo, asinou un convenio de colaboración co representante da Fundación Tierra de Hombres, Raúl Besada Vázquez, para colaborar cos gastos do proxecto ‘Viaxe cara á vida 2013’, para o que a achega da Deputación Provincial será de 8.000 euros, o 80% dun orzamento de 10.000 euros.
O proxecto “Viaxes cara á Vida” desenvólvese a nivel nacional a través de acordos coa Fundación Tierra de Hombres España cos centros sanitarios da nosa comunidade autónoma.
Neste ano está previsto traer 8 nenos/as de distintos países africanos para facilitarlles a atención médica especializada que precisen, así como a súa recuperación en familias de acollida.
“Trátase de nenos con enfermidades graves como cardiopatías e que necesitan ser operadas para que poidan seguir vivindo”, explicou Raúl Besada tras a sinatura do acordo na Deputación.
Salientou, do mesmo xeito, o “papel fundamental” que xogan as familias de acollida e todos os médicos que participan no proxecto, ademais da “importancia” de contar coa colaboración de institucións como a Deputación da Coruña.
Fuente: Deputación da Coruña
